olte freund

T. & M.: Hannes Urdl

wie da lichterschein von am leuchtturm,
der si immer wieder draht,
wie im t-shirt drin des nächste graue hoar
wie a blattl des aufs doch vawaht
wie raketen zu neujohr
kommts ihr immer wieder in mein leben vor.

i seh´n vor mir den oltn schulweg
ba da rothausgossn dort,
wo ma gut die welt erklären kann und
reden immerfort.
i sehn vor mir den olten flügel
hea an fantasiechoral
mit nur weisse tasten und mit viel pedal.

i hob den duft no in da nosn
von da holzstiagnpolitur
und ums eck herum do wor die deplazierte kuckucksuhr.
irgendwann seids ma ins herz grutscht
so wia ma ausrutscht auf´ m schnee
und jetzt wohnts bei mir in meiner herz-wg.

olte freund - so kostbar san die augenblick mit euch
so locker und an schrulligkeiten reich
olte freund - nur anes no - es liegt ma sehr vü dran,
daß i´ s älter werdn mit euch genießen kann.

es wor so schwer si an plotz zu finden
do auf dera welt, die so beschissen is und
wunderbor zugleich.
heut kann i sogn, mia hobn an gfundn
a jeda an in sein bereich
g´holfen hot des wissen, es geht jeden gleich.

olte freund - so kostbar san die augenblick mit euch
so locker und an schrulligkeiten unvergleichbar reich
olte freund - nur anes no - es liegt ma sehr vü dran,
daß i ´s älter werdn mit euch genießen kann.

wira lang verloren g´laubtes foto
in an oltn buach,
wie a gummianten in an wosserlauf,
wie a futzerl in an schuh drin,
so wie da pforra ba da tauf,
tauchts ihr immer wieder in mein leben auf.

so wie des lochen und des
rotz und wossa wanen z´sammeng´hean,
wie da klane prinz auf seinen klanen stern
und so wie runde schworze punkterl zum
marienkäferl g´hean,
seid´s a teil von meinem leben, meine herrn.

olte freund - so kostbar san die augenblick mit euch
so locker und an schrulligkeiten unverzichtbor reich
olte freund - nur anes no - es liegt ma so vü dran,
daß i ´s älter werdn mit euch genießen kann.

olte freund - nur anes no - es liegt ma sehr vü dran,
daß i ´s älter werdn mit euch genießen kann.

in ollem drin

T. & M.: Hannes Urdl

da wind - da wind
streicht übers lange gros
imma dahin - imma dahin
mit sein weichen großen pinsel trogt er
schottn auf und licht
immer dahin - immer dahin

des bluat - des bluat
rinnt durch die odern durch
imma dahin - imma dahin
der lebensozean - er trogt in sich
die leidenschoft und lebenskroft
immer dahin - immer dahin

a sinn - a sinn
is wohl in ollem drin
in ollem drin - in ollem drin
wer kann scho jedes mol erklären
wo er dahintersteckt
wie ma´ n entdeckt
in ollem drin - in ollem drin

des grau von deine hoa

T. u. M.: Hannes Urdl

deine dunkelblonden hoa
kommen a scho in die joah.
a bissl grau schleicht si aun
schimmert do und durt hervor.

manche reden di drauf an
und dann san a scho gedanken drüber do.
wennst mi frogst - färb si net
loss si so.

des grau von deine hoa
is die veredlung ihrer forb
es zagt die joah, es zagt, wie´s woa
und wie du jetz zu oll dem stehst.
du bist du, so wia du bist
und so hob i di am liabsten ba mia do.
wennst mi frogst - färb si net
loss si so.

wal im grau von deine hoa
san olle tog und nächt vawobn
di ma zsammen durch de welt gangen san.