in mein blumengortn

T. u. M.: Hannes Urdl

in mein blumengortn
wochst a kletterrosenstrauch
er sucht si immer grod gnua holt
wü immer weiter rauf
feine rosa blütnblattl bewegn si zort im wind
i schau ihn an - denk an mei erstes kind
so guat verwurzelt wochst es ganz verwegn
dem himmel entgegen - auf ganz eigenen wegen

in mein blumengortn
gibt’s a fleckerl nur mit klee
im frühling is die wiesen
wira lila blütensee
bienen sammeln nektar und summen mitn wind
i leg mi zuwi - denk an mei zweites kind
es trogt a grüner teppich di durchs leben
auf glücksblattln schwebn
nehmen und geben.

in mein blumengortn
auf da andren seitn drübn
do wochst a stämmig-junger strauch
a weisser jasmin
sei duft bezaubert menschen,
junge katzerln und den wind
i nimm ihn auf -  denk an mei drittes kind
es treibt nur aus und wochst nur wann es wüll
sonst is es still - im eigenen gfühl.

in mein blumengortn
find i so vieles, des i brauch
i sitz gern im schottn von an
goldregenstrauch
der is immer in bewegung
im tanz mitn wind
i tanz gern mit - denk an mei viertes kind.
von dem goldnen blütenblattlmeer
schenkts gern blattln her
hot no vü mehr.

i sing meine lieder

T. u. M.: Hannes Urdl

i sing i sing i sing meine lieder
und meine lieder singen mi
sie san ma so wie schwestern und wie briader
san a tal von mir und kummen iwa mi. (wh.)

singen - im wossa mit an goldfisch
mit an guaten freind im wirtshaus unterm tisch
singen - mit an vogerl aufm bam und amol im lebn
singen mit an engel in an tram.

einisingen in des schworze von da nocht
singen - so lang singen bis as bluat fost kocht
singen - wie der könig fia sei queen
und mit dir z´sammen singen unter da deckn drin.

la la la…

i sing i sing i sing meine lieder
und meine lieder die singen mi
sie san ma so wie schwestern und wie briader
san a tal von mir und kummen iwa mi.

singen, so wie der regn aus die wolkn follt
wie in da fruah zorte töne ausn wold
immer wieder singen trotz oll dem lärm
und a dann singen - grod dann  - wenn die leit vor hunger sterbn

singen, weil die welt so is mit oll ihre forbn
singen mit an neugebornen baby aufm orm.
singen, bis da rosenstrauch aufbliaht
deswegen sing i deswegen imma liad um liad

la la la…

i sing i sing i sing meine lieder
und irgendwie singen meine lieder mi
sie san ma so wie schwestern und wie briader
san a tal von mir und kummen iwa mi. (Wh.)

olte freund

T. & M.: Hannes Urdl

wie da lichterschein von am leuchtturm,
der si immer wieder draht,
wie im t-shirt drin des nächste graue hoar
wie a blattl des aufs doch vawaht
wie raketen zu neujohr
kommts ihr immer wieder in mein leben vor.

i seh´n vor mir den oltn schulweg
ba da rothausgossn dort,
wo ma gut die welt erklären kann und
reden immerfort.
i sehn vor mir den olten flügel
hea an fantasiechoral
mit nur weisse tasten und mit viel pedal.

i hob den duft no in da nosn
von da holzstiagnpolitur
und ums eck herum do wor die deplazierte kuckucksuhr.
irgendwann seids ma ins herz grutscht
so wia ma ausrutscht auf´ m schnee
und jetzt wohnts bei mir in meiner herz-wg.

olte freund - so kostbar san die augenblick mit euch
so locker und an schrulligkeiten reich
olte freund - nur anes no - es liegt ma sehr vü dran,
daß i´ s älter werdn mit euch genießen kann.

es wor so schwer si an plotz zu finden
do auf dera welt, die so beschissen is und
wunderbor zugleich.
heut kann i sogn, mia hobn an gfundn
a jeda an in sein bereich
g´holfen hot des wissen, es geht jeden gleich.

olte freund - so kostbar san die augenblick mit euch
so locker und an schrulligkeiten unvergleichbar reich
olte freund - nur anes no - es liegt ma sehr vü dran,
daß i ´s älter werdn mit euch genießen kann.

wira lang verloren g´laubtes foto
in an oltn buach,
wie a gummianten in an wosserlauf,
wie a futzerl in an schuh drin,
so wie da pforra ba da tauf,
tauchts ihr immer wieder in mein leben auf.

so wie des lochen und des
rotz und wossa wanen z´sammeng´hean,
wie da klane prinz auf seinen klanen stern
und so wie runde schworze punkterl zum
marienkäferl g´hean,
seid´s a teil von meinem leben, meine herrn.

olte freund - so kostbar san die augenblick mit euch
so locker und an schrulligkeiten unverzichtbor reich
olte freund - nur anes no - es liegt ma so vü dran,
daß i ´s älter werdn mit euch genießen kann.

olte freund - nur anes no - es liegt ma sehr vü dran,
daß i ´s älter werdn mit euch genießen kann.